Ziema ‘Ngiulina suspirava

Ziema ‘Ngiulina suspirava

quanno Tore suio nun steva a casa.

Nu piezzo ‘e pane

ca sempe le mancava,

nu piezzo ‘e ommo

sulo casa e fatica.

Tore jeva sulo a fatecà,

ma sulo non jeva manco a ret’’a casa

pe dà nu sguardo ‘o ‘ntoneco d’’e mmure.

Cu ‘e figlie na parola era troppo,

curreveno appena isso ‘e guardave

e avesse maie apierto nu giurnale

e ditto na parola ‘e che penzava.

Quanno ferneva ‘o turno

turnava a casa comme n’era asciuto

e s’assettava sott’’o pergulato

guardannese ‘o pate

ca fumava e ragiunava

sempe a modo suio.

‘O nomme ‘e ‘Ngiulinella

s’’o squagliava mmocca

e si ‘a guardava

se ne jeva ‘e chiocca

e a uocchio a uocchio

se ‘nfilava dinto

addo essa

comme ‘a voccula

‘o cuvava.

Gioacchino Ruocco

Ostia Lido 26/06/2014

Inserita nella raccolta “Aret'a ferriera”