Che pacienzia pe campà !

Lassa ‘o stà… è ‘nziria ‘e suonno…

pure si ll’età ca tene

nun ammette stu latuorno.

E’ già quase na semmana

ca va nnanze cu sta storia.

Quanno è ssera nun s’addorme

e ‘int’a notte sta scetato

e stu lietto l’arrevota

e ‘o riduce na mappata.

Sente cavero, po’ friddo,

nu dulore dint’a spalla

po s’aiza e va a taralle.

Po s’appoggia n’ata vota

e accummencia ‘o terramoto

ca se ggira e se riggira.

Chi ‘o ssa si ce ‘a facimmo !

Si dicesse ch’isso tene

‘o putesse cunfurtà.

Ma è nu poco ‘e tiempo a nuie

ca nun parla o fa l’offeso

e dimane fa nu mese.

Io m’’o guardo e l’accarezzo

sulamente cu chist’uoccie.

Si le dico na parola

quase quase me mpapocchio,

ma nun è na scusa ‘a mia.

E ‘o penziero corre a nnanze,

po’ v’arreto e nun s’acqueta,

po’ s’addorme all’impruvviso

se fa ’a matinata

ca scetannesse cchiù tarde

quanno proprio è sazio ‘e suonno

tene ‘a faccia arrepusata

e me guarde curiuso

comme io stesso malata.

Tengo ll’uocchie addormentate

comme faccio a ce ‘o spiegà ?

Mo songh’io ca so’ malata!

Che pacienzia pe campà !

Gioacchino Ruocco

Ostia Lido          22/06/2014

Inserita nella raccolta “Nu juorno comme a n’ato”