Nun era tiempo ca cuntava ll’ore…

Nun era tiempo ca cuntava ll’ore…

Nu juorno ‘e chisto

Senza farlo apposta

Vengo a truvarte

Comme facevo quanno

Jevo truvanno 'a te

Nu vaso o na carezza.

Ducezza ‘e ll’ati tiempe

Quann’ammore

Teneva nu sapore

‘e nu guaglione

Ca cercava cumpagnia

Pe ji a nnanze.

Quanno ll’ammore

Nun era compiacenza

Ma nu juoco

Pe pazzià tutt’’a jurnata

A farte nu dispietto

Appriesso a n’ato

E te sceppavo

vase in quantità,

quanno ‘a felicità

era na cosa

ca te rigneva ‘o core

e nun capevo

pecchè me succedeva

proprio cu tte

ca nun si stata maie ‘o tipo

ca na carezza

m’’a deve a piso

‘o doppo nu suspiro.

‘E juorne nire

Cagnaveno culore

Bastava na parola

Ca ogne cosa

Pigliava ll’aria

D’’a felicità.

E me diceve canta

E io te cantavo

Tutte ‘e canzone

Ca vulive tu.

E ‘o tiempo

Nun era tiempo

ca cuntava ll’ore

E ‘o core

Ancora nu guaglione

A pprimmo acchitto

Era cuntento

Felice e beneritto.

Nu juorno ‘e chisto

Si nun cagno via

Me truovo

Affianco a te

C’’o vraccio astritto

Comme te piaceva.

Sulo pe nu dispietto

Me faie suffrì

E cchiù nun trovo pace.

Chi me da pace

‘o ssaie si sempe tu

O forse nu ricordo ‘e giuventù ?

Ruocco Gioacchino

Ostia Lido. 04/08/2013