1)
'O PALLONE
Nce so' ghiuto int' 'o pallone
e pircio ve saccio a di'
tutto chello ca vedette,
e v' 'o ppozzo fa capi'.
Me mettete int' 'a canesta
miezo 'a folla ca guardava:
quaccheduno cumpateva,
quaccheduno cuffiava,
e nce fui chiù de n'amico
che dicette: — Ferdinà,
sagliatenne allegramente,
jammo! E nun t'appaurà!
Io tenevo 'a faccia janca,
v' 'o ccunfesso, sissignore;
ma pero' ve l'aggia dicere
ca nun era pe' ttimore!
Me credevo 'avè paura;
ma, guardanno 'o capitane,
alluccai: — Saglimmoncenne!
Stammo 'a mo fino a dimane!
Belli ccose! Nun v' 'e ddico,
pecché nun se ponno di' !
Pe' n'avè n'infanzia bona
jate, si nce vulit' 'i' !
Basta, jette. A mille metre
dint' 'e recchie me fiscava;
ma che fa ? Chillo spettaculo
a pparola mia, ncantava!
Cielo e nuvole. E da sotto
'a città che scumpareva,
e na tana de furmicole
ogne cosa me parave.
Ditto nfatto, 'o ppoco 'e luce
se cagnai, po' scumparette. ..
Era notte, e, abbascio, 'e strate
me parevano merlette
puntiate 'e ponte 'e fuoco...
Tutto Napule, allummato,
deva idea de nu tappeto
d'oro e argiento arricamato.
Ncapo a nui redeva 'a luna,
quacche stella zenniava;
mmiezo a ll' aria doce e fina
'o pallone sciasciava. ..
— Addo jammo? Addo scennimmo?
Capità? — Ma 'o capitane
da sta recchia nun senteva!
Cu nu litro 'e rumma mmane
s' 'o veveva a surzo d'acqua;
po' pigliai nu sacco 'arena,
l'abbuccaie, 'o sbacantaie,
e, cu 'a vocca ancora chiena
de na coscia 'e pullo friddo,
s'avutai vicino a me
e dicette: — Andiamo in cielo!
Visitiamo il Re dei Re!
Nun fui cosa meza detta,
ca, che ssa', chiudenno ll'uocchie,
(nun redite, e nun dicite:
Ferdinà, tu che mpapuocchie!)
'o ccert' è ca me truvai
mmiezo 'e nnuvole fermato...
'O pallone, 'o capitane,
ogne cose era sfumato.
— Addô sto? Mannaggia 'o ciuccio!
Addô vaco? Addô m'avoto?..
Cammenammo?.. E si sprufonno?
Si me vene quacche mmoto?
Faccio un'anema e curaggio
e m'avvio chiano chianillo...
Nnanz'a me passai, vulanno
comm' 'a quaglia, n'angiulillo...
— Va, nce simmo! io murmurai;
già se vede quacche cosa. ..
Voto Il 'uocchie e veco ' o cielo
puntiato 'e fronne 'e rosa.
Voto 'e spalle, e tutt'attuorno
veco nuvole rusate;
po' na specie 'e murmurio
sento, e doppo, allummenate
veco 'e mmure 'e Paraviso
cchiù de Il'oro e cchiù d' 'o ffuoco...
Me faccio anema e curaggio
e m'accosto a poco a poco...
Pe' ttramente sbariavo
nfaccia 'o mezzo pe' ttrasi',
sento a uno che me chiamma:
— Che ffai lloco? Tu chi si?
Uh, sant' Anna, e che splennore!
Era proprio 'o Pat'Eterno
che dicette: — Torna 'nterra,
ca si no. ..vai all'Inferno!
Nun fa' troppo 'o capuzziello,
pecché 'o ssa'! Povero a tte!
— Io nun faccio — rispunnette —
niente 'e male, Pat'Etè !
— E chi si'?.. — So' Tale 'e Tale...
— E che fai? — So' nu scrittore...
-"Ferdinando arreto 'a Posta?"
Te cunosco, sissignore!
Si' nu bello mbriacone,
si nun sbaglio, Ferdinà!
Tu fai dint' 'a capa 'e morta
e po' curre a ppredecà!
— Pat'Etè, state in errore!
Io nun songo già stu tale!
Songo Ferdinando Russo,
'o pueta dialettale...
— Uh mannaggia 'o dialetto!
Pure ccà me vuô zucà ?
Comme fosse a Piedigrotta ?
Che nce si' venuto a fa'?
Vuô parlà d' 'o Paraviso?..
Va dicenno: che vuô di'?
Io te saccio buono piro! ...
'O rispette, piccerì. ...
— Ma guardate... ma sentite...
— russo russo io rispunnette —
Si nne parlo, se capisce
ca nne parlo cu rispette. ..
'O Signore me guardava!
Po' dicette: — Si' ttenace!
E cu st'anema 'e faccetta,
picceri', tu... me piace.
Mpertinente cumm'a chisto
mai nisciuno è capitato ! ...
Io so' sempre 'o stesso viecchio,
ma llà 'o munno s'è cagnato!
E redeva sott' 'a barba
chiano chiano, 'o vicchiariello;
po' appujannose 'o bastone:
— Jamme, miettete 'o cappiello!
— me dicette — si' vvenuto?
quacche cosa 'o bbuo vedè?
E va bè, sarai servito!
Viene sempre appriesso a me!
Da 'Nparaviso di Ferdinando Russo (1)
Questa poesia è stata pubblicata anche in "Gente di Stabia" il giorno 09/02/2012
Nessun commento:
Posta un commento