mercoledì 18 novembre 2020

Quanno se perde tiempo 19.11.2020

 Quanno se perde tiempo

ormaie s’è perzo,

nun torna arreto

manco c’’a cupeta

ca pure ‘e ddete

‘e vvote fà ‘lleccà.

 

‘O core accussì

se sente perzo

pure si ‘o tiene mente

pe gulio.

Anema d’’o Carmena

sora mia carnale

 

ca nun me lasse maie

sulo ‘mmiez’a na via

specie

quanno sona avemmaria

e sento ‘o friddo ‘ncuollo

e tutta n’’a junata

 

ca s’è fatta fredda

p’’a speranza perza

c’o munno campa

cu na trezza ‘ncuollo

ca fa tremmà ‘e paura

c’’o munno se ne cade

 

a piezzo a piezzo

pecchè le và ‘e travierzo

qualche cosa

o troppi ccose

ca bbone nun s’accocchiano

dint’a sti denocchie

 

ca tremmano ee tremmanno

m’aggio fermà pe forza

c’’a scorza mia

dà segne ‘e stanchezza

e dint’’a rezza

nun ce resta niente.

 

E c’’o cafè sospeso

nun se campa

ca manca ll’uoglio a lampa

e dint’’a casa,

si nun ce stà ‘a luna,

io nun veco cchiù.

 

Chi m’accumpagna s’io resto sulo ?

Io nun me fermo ancora…

Si me lagno ‘o faccio

pe me sfugà nu poco

pe me lavà ‘a faccia

cu ‘e lacreme ca chiagno….

 

speranno ca dimane ‘o sole torna

pe nun nun lascia ‘o scuro

chistu vico ca ce ne stanno

tantecomme a chisto….

senza sparagnà

cchiù ‘ncopp’’o scisto.

 

Ostia Lido            19.11.2020

Nessun commento:

Posta un commento