Chi sa si torna ancora primmavera …

Chi sa si torna ancora primmavera

doppo a stu vierno friddo e sfasteriuso.

Pare c’’a gente ha perduto l’uso

e se fa quatto passe ‘int’’a jurnata.

Si aiesce mo’ te faie tutta ‘nfosa

pure si puorte ‘o mbrello o na ncerata.

Int’’o ciardino l’acqua appantanata

pare c’’o mare è arrevato ‘nterra.

Ormaie ‘e stucchie nun serveno a fà fuoco

ma sulamente ‘e puparuole arruste.

e na vrasera cu ‘e scorze ‘e mandarine

chi s’arricorde cchiù! Cagneno ‘e tiempe,

ma a bbuono cunto chello ca po’ ardere

e ce po’ da’ calore ‘o mette sempe

a pparte ‘nzieme a ll’ato ‘int’’o pagliaro.

Tengo na pena grosse dint’’o core,

me mette dint’’o lietto e me ne more.

Senza cu tte vicino a fa ll’ammore

‘a vita pare niente e ‘o viente strille

comme si ‘o sceppassero ‘e capille.

Abbascio ‘o mare tutte ‘e lampare

dormeno sbattute si stanno ‘nterra

o dint’’a ll’acqua cu nu peso muorto

ch’’e tene a bada a chistu male tiempo.

M’appena metto ‘a capa fore ‘a porta

‘o viento friddo quase m’è taglia ‘a faccia.

Peppino mio ogge pare è nu straccio.

Sta dint’’o lietto e fa na tossa secca.

Mo’ ‘o faccio nu decotto ‘e fiche secche

e na surata sicuro le fa bbene.

Si ce mettino tutt’’e duie ‘nt’’o lietto

allora si c’hadda passà ‘a nuttata.

Si torna primavera faccio festa!

Voglio essere felice e ji ‘a spasso

Addo me porta ‘a voglia e suspirà

Pecchè voglio penzà nu poco a me

Ca stu vierno me sta facenno scemo

e tra na cosa e n’ata arriva a sera

ca sto distrutto e miezo scunzulato.

Quant’acqua nterra ogge ca menato!

E quanta piante ogge c’ha schiantato !

E purtualle c’arrunamme ‘e terra

Ne tengo quatte sporte ammuntunata

E d’’e limone nun ne parlamme proprio.

 Gioacchino Ruocco 

Ostia Lido 27/01/2014        ore 15.00

Inserita nella raccolta "Suspire e miezejuorno"