S. Dalì

Opera di Salvator Dalì

Uva, castagne e mela,

vedimme chi t’’a pela.

Pilo pelillo,

na fella ‘o piccerillo

una ‘a mamma e ‘o pate

e ‘o riesto all’ati frate

a chi stà attuorno ‘’a tavula

e ancora sta a parlà

pure si è muorto ‘e suonno

e ‘un se vò jì a cuccà..

‘O Bammeniello nasce

dint’’o pesepio

fatto ‘ncopp’a cascia.

‘A casa è piccerella

e sciato sciatillo

se fà caurulella.

Basta na zuppulella

pe fà ‘e facce allera.

‘O cunto ca ce conta

Rifuggia ‘a gragnanese

ormaie l’avimmo ‘ntiso

tanta vota,

ma essa gira e avota

pare ch’è sempe nuovo.

Na scorza ‘e madarino

d’int’’o ffuoco

cagna ‘o resipro a ll’aria.

Ormaie è mezanotte.

Stanno sparanno ‘e botte

dint’’o vico

e songo tricchi tracche,

scalette e bomme a muro.

Può sta sicuro,

me pare capuranno

si tanno 'e fanno

ancora cchiù pesante.

Quanno nascette

Ninno a Bettelemme

tutto stu casino nun ce steva.

Dint’’o presepio

ormaie ‘o criaturo

sta arravugliato

‘int’a nu fasciaturo.

E’ ‘o figlio e ‘Ntunettella,

appena nato.

Ormaie ‘a mamma e ‘o pate

hanno pariato

c’’a figlia, ‘a figlia loro

se n’è juta

‘nzieno a Cicculillo

‘o figlio ‘e Peppe

‘e vascia ‘a guardia

ca va mettenno zeppe

e arraffa e mbroglia.

Guarda comm’e bellillo

‘o ninno nuosto,

me pare fatto apposta.

Quanta capille

ca già tene ‘ncape,

me pare comm’’o frate

ca gia tene

ca Cicculillo già n‘avuto

n’ato a n’ata  e n‘ato

sta ‘spettanno ‘a Nunziata.

I che presepio

ca fatto st’ommo ‘e niente;

na mise ‘ncinte tre,

tutt'e tre tre bammenielle.

Mò se fessea

e va dicenno ‘a ggente

ch’è meglio ‘e niente

chello c’ave fatto,

tanto na casa ‘a tene.

Ha dato ‘o sfratto

a chi solde nun tene

mettene nmieze ‘a via

‘a don Giuseppe,

ca nun ce azzecca

niente cu sta storia

e cu’ o figlio ‘e Dio

ca sta ‘int’’o presepio

ca facc’io.

Dimane ne parlammo,

doppo dermuto,

ormaie me so’ stancato.

Ve saluto

e santa notte

a chi nun trova pace.

Dimane me cuntate

‘o riesto comme è ghiuto.

Gioacchino Ruocco

24.12.016     Ostia  Lido