Eduardo…
M’’o guardo
e dico nun po’ essere Eduardo
chillo ca tengo nnante,
ca m’è venuto ‘nzuonno…
Quanno m’addormo a sera
nun penzo né a pariente
ne a Maronne
e manco a ll’onne d’’o mare
ca me danno
tanta malincunia
‘a quanno aggio lasciato.
‘O tengo nnante ’a casa
ma faccio finta ‘e niente,
ma don Eduardo ca pare nu parente
me porta arreto, a quanno recetavo
facenno ridere e divertì
chille ca pavaveno ‘o biglietto
o chille ca p’’a via me fermaveno
facennemo ‘o rispetto ‘e ‘ntartaglià.
Credette c’’o triato e doppo ‘o mare
erano ‘a vita mia.
Cagnanno mestiere
me venette a mmente
nu juorno ca screvevo poesia
‘a quanno… ‘a quanno
si me vene a mmente
po’ v’’o ddico,
pecchè l’eve stracciate
tutte quante
nu juorno ca nu santo
pigliannemo d’’a parta soia
vuleva ca io…… ma io no
nun ‘o putetto accuntentà.
Dicenno ‘a verità
c’era na guagliuncella ca
me faceva ‘e ciance
e io cu ‘a capa fresca ca tenevo
invece vulevo fà o santo…
pe nun a dà fastidio inutilmente…
Dannelo nu vaso me perdette
e accumminciaie a scrivere sunette,
po’ vieze sciuovete
c’‘a fantisia me curreva ‘nnanze.
Nu juorno ca me venette
nu dulore ‘e panza
e nun ve dico che me succedette
mettette ‘a capa a posto
e me jette luntano a fetecà.
Dicenno ’a verità me cummenette
pure si sonno ancora c’aggia fà
M’aizo ‘e notte ‘e scrivo
e qualche vote prejo ‘o pataterno
‘e fa sta meglio tutta quanta ‘a ggente
senza cercà ’o meglio
c’’o meglio nun ce sta ‘ncopp’a sta terra,
ca nu penziero amaro è malamente
ca dimane nun saie che te succede.
Vulesse ca qualcuno s’arricurdasse ‘e me
quanno è fernuto ‘o tiempo.
Io tengo ‘a capa chiena ‘e tanta ggente
‘e tutte chille c’aggio canisciuto,
c’aggio perduto ‘e vista
ma stongo arricurdà
p’arrefriscarmo ‘o core
primmo d’’e lascià
pure s’i ‘o meglio ‘e lloro
farrà comme io facette
ormaie tant’anna fà dicenno:
Povero a isso ca nun m’arricordo,
povero a me si l’aggio canisciuto…
Gioacchino Ruocco
Ostia Lido 22.09.2020 h 17,30
Nessun commento:
Posta un commento