Poeti napoletani: Salvatore Cerino

NA SURGENTE ‘E  CASTIELLAMMARE

Ce songo stato, sì a Castiellammare,
(c’è na surgente p’ogne malatia)
pe me sanà da na malincunia
‘a quanne ne murette Viviani!

Tanno, murette pure papà mio.

Facenno ‘o lungomare suspiravo
e me gudevo Napule ‘e rimpetto,
l’aria d’’o mare e ll’aria d’’e muntagne!

Guardanno po ‘o Faito
penzavo ‘e ripusarm’ ’o “Quisisana”
e farme na passiata int’ ’o tramonto
p’’a strata panoramica.

Ma po’, guardann’’o mare,
annanze all’uocchie miei accumparette
na scena viva de’“Padroni di barche” e don Rafele
pareve nu disegno del Doré.

Cuntente e suddisfatte s’’o guardavano
Bernari e Ricci nzieme cu Vittorio…
E, llà pe’ llà penzaie: “Sta fantasia,
forse è l’effetto d’’a malincunia!”

Arrivato dint’’a Villa…
“Ma  songh’io, o nun songh’io?
o arriva a tanta chesta fantasia?”

Na fiamma serpiaie dint’’e vvene

e me sbullette ‘o core…
Rafele Viviani steve llà
c’’o monumento ‘e bronzo int’a n’aiuola!
Er’isso e nun  ce steva ‘a dubità.

Er’isso e me guardava
cu tanta tennerezza…
e pare studiava ‘o personaggio.

Io l’aggio salutato

cummosso affezionato…
e l’aggio recitato:
Nchiastillo, l’Emigrante,
Fravecature, ‘E zinghere.

Cu ‘o core ardente me so’ alluntanato,
sentennolo cu mme:
E… cammenanno ‘a llà, suspeso quase,
aggio penzato: ‘O vico,

Tuleto ‘e notte, ‘O buvero…
e tante d’’e cummedie ‘e chesta vita,
scritte c’’o core ‘a  ‘Ll’urdemo scugnizzo!”

Sentevo ‘o murmurio pe dint’all’aria

e 'nduvinava ‘e vvoce, ‘e sentimente…
tutt’’e nnecessità .

E penzo e benedico
Castiellammare ‘e Stabia

ch’ha dato na surgente
ch’è ‘a cchiù beneficante,
e mette dint’all’anema,
d’’a vita, ‘e vverità.

E pe sti vverità d’’a vita mia,
scumparzo è ‘o senzo d’’a malincunia.

Mo veco a Viviani mmiez’’o cielo
‘e chistu golfo ‘e Napule,

comm’a nu Dio  ca chiagne e ca vo’ bene
e scrive ancora scene!...

Cu prose, vierze e musica e tanta umanità,
è stato nu fenomeno pe tutt’ ‘ società.


Salvatore Cerino