Na sera me mettette appiso

Na sera me mettette appiso

Na sera me mettette appiso

a ‘o braccio ‘e Eduardo

seguenne ‘e passe suie

comme a nu cecato

ca s’abbandona

sicuro dnt’’e mmane ‘e n’ato

addeventanno na perzona sola.

Quanno ce simmo abituate

isso a purtà e io irle appriesso

pure saglienno ‘e scale

o ‘ncopp’a na via nova

me songo abbandunato

sentenno ‘nganna

‘o nuozzolo d’’o chianto.

Sembrava nu frate mio cchià gruosso.

Parlavemo senza jì maie ‘e pressa,

senza tenè ‘a neve dint’’a sacca

pe ati fatte, pe na culata stesa

ca ‘o tiempo  ca s’adumbrava

già ce metteva ‘nfaccia

‘o friddo ‘e ll’ombra

ca ‘un ce lasciava ‘e pede.

Vulette sapè io che facevo,

pecchè screvevo e che vulevo fà.

Quanno le cuntaie ‘a vita mia

restaie sopra a penziero

e me dicette e nun me scuraggià

Quante n’avea sentute 'e fessarie

quanno teneva appena quinnicianne

stanno appriesso ‘o pate

c’’a furtuna soia era sul’isso.

Se resperava ‘nziemo c’’o frate e a sora.

‘O chianto ca le scenneva ‘a ll’uocchie

me cummuvette fino a dint’’a ll’osse

ca me fermaie  pe m’appuià a nu muro

ca ‘e cosse nun ‘e sentevo cchiù

e manco a isso ca cu na mano aizata

e cu na voce roca me salutaie dicenno:

- Nun t’’a piglià ca certa ggente parlano

ca ‘un sanno c’hanna fà.

Dimane songo ‘e stesse ca senza fatica

vanno a chiaitarse ‘o lloro

addò ce sta chi ‘o dà

ca nun l’avasta cchiù chella cammisa

ca se truvaie ‘ncuollo quanno nascette.

Mò vanno truvanno tutt’’o paraviso.

Gioacchino Ruocco

Ostia Lido    12.06.2020.- h 19.00