‘A primma vota ca jettemo a vutà

‘A primma vota ca jettemo a vutà

i’ ero piccerillo, nun ‘o putette fà

però ’e bombe ‘ncapa

pur’io l’ero   pigliate.

Chiacchjere a nun fernì

e uno contro a n’ato

primme ca succedette

ca chi ave capì

nun saccio si capette.

‘O prevete diceva;

-Penzate a quel che fate

ca si mò ve sbagliate

dimane ‘un se po’ cchiù

ca isso già sapeva

‘o Ddio suie qual’era

e nuie,nun ‘o voglio dì,

povera ggente

ca stanno a isso,

nun capeva niente,

doppo tanta muorte

e sufferenze ‘e anne

sciglietteme nu fatto

c’ancora ce truvammo

ca è sempe meglio ‘e primmo

quanno ‘o cummannante

era uno sulo

cu tutt’’a cricca attuorno.

Sentette cose brutte

doppo sufferto tanto:

‘a tessere p’’o pane,

‘a chiesa a prià ‘e sante

e ‘o broro sempe finto

senza cunnimma maie

e nu pezzullo ‘e uosso a rusecà

quanno accedeve ‘o puorco

a vicina ‘e terra

e nun sapeva che ne fà

c’’o bbuono  o s’’o teneva

o s’’o  venneva

a chi teneva ‘e sorde

a centenare.

Chill’uosso

era ‘o mmeglio ‘e tutt’’o broro

e ‘o schezzillo ‘e carne sapurito

ca te metteve ‘ncuollo nu prurito

ch’era ‘a criscenza

ca nu ghieva acito

pure si aspettava

già ‘a paricchio.

C’’o sicchio ‘a piglià ll’acqua

e ‘o bagno quanno faceva estate

c’a mmare te jettaveno

cu tutt’’e panne.

‘A mutantella…

e chi ‘a teneva ‘ncuollo ?

Quann’ette ‘a scola

ma truvaie ‘addosso

ca nun sapevo ancora a che serveva.

Chist’era ‘o tiempo mio ‘a piccerillo

ma m’accurgette

ca ce steva ‘a guerra

quanno nu remmore dint’’o cielo

sentette ‘ncapa a me ca m’arrevava

e doppo me truvaie ancora vivo

ca me guardavo attuorno

jenne cercanna a ziema

ca già a nu poco jeva

chiammanno ‘o nomme mio.

Nun me capacitaie,

nun me capacitavo

ca ero ancora vivo

e cammenavo ‘ncopp’a via d’’a casa

addò truvaie ggente ca nun ce credeva

guardannemo ancora sano sano.

M’addummanava  come me sentevo.

Ero sterduto ma ‘e sentevo

senza sapé che dicere

ma ancora sano sano.

‘A nonna me pigliaie ‘dint’’e bracce

e m’astrignette ‘mpietto a essa,

ca mamma nun ce steva chillu juorno.

Jeva vennenno ‘o ppane tuorno tuorno

purtanno ‘e solde a casa

ca ‘e vvote ce serveveno

p’accattà ‘e cose c’’a terra nun ce deva.

Quann’’a vedette

le zumpaie ‘ncuollo

e annascunette ‘a facccia dint’’o muollo

d’’o pietto suio e ma’appaciaie

comme si fosse stata

na grazia ricevuta.

Gioacchino Ruocco

Ostia Lido        05.06.2020