Poeti Napoletani: Gioacchino Ruocco

Mariù

Addore 'e festa ll'aria

e 'o core è na canzone,

Mariù fore 'o balcone

sta sulo a suspirà.

I' passo e spasso sotto,

'a guardo, m''a smicceo,

'o saccio ca s'è cotta

perciò me 'ncapuneo.

Essa fa 'a tosta e i' pure,

essa nun guarda e i' guardo,

m'appojo 'nfacci' 'o muro

e stongo fino a tarde.

Addore 'e festa ll'aria

e 'o core è na canzone,

stanno sott''o balcone

sento cantà 'a canaria.

E aspetto e sempe aspetto

speranno ca se molla,

c''o core lle se scolla

pe farme nu dispietto.

Addore 'e festa ll'aria,

tu nun te muove e i' pure,

m'appojo 'nfacci' 'o muro

e guardo sempe a te.

Piano di Sorrento 1956

La voce di Stabia – marzo 1956

Si nun t’accuorge ‘e me

Si nun t’accuorge ‘e me

che stò a duie passe,

chisà che staie penzanno

‘a stammatina.

Ll’aria ch’è doce

nun te cellechea

e nun te sceta ‘o sole

che t’abbaglia.

‘A vita 'un è nu sbaglio

c’’a nuie avimme fa,

è na prova

ca nun se po’ scanzà.

E intanto io me strure

sempe appoggiate ‘o mure

pure si ll’aria è doce…

E canto sottovoce

na canzone

pe nun ‘o ddà a vedè.

Povera canaria,

nun sape cchiù che fa !

Vola ‘int’’a ll’aria,

m’addò s’adda pusà ?

‘E tiempe so cagnate

ma io t’aspetto ancora

ca faie na guardate,

almeno nu sorriso

ca comme ‘o paraviso

stongo aspettano ‘a te.

Ostia Lido,   17 febbraio 2011