Sulo sulagno
‘a nu poco ‘e tiempo
te ne staje a ‘mmiezo ‘o mare
guardannete attuorno
e ogne sera
senza na luminaria
muore c’’a notte
c’addeventa avara
d’’o respiro tujo
‘e tutta na storia
che suppuorto sulo
fino a che se schiara ‘o juorno
cu nu penziero nuovo
ca eterno te cunsuma
e te ristora
pe ogne malapatenza suppurtata.
Attuorno quanno l’onne è rara
t’adduorno
int’a nu suonno
ca sembra nu ristoro,
preta e memoria
d’’o tiempo ch’è passato
mmiez’a stu mare
ca nun me parla ‘e quanno
ire na cimme ‘e monte
dint’a nu viento
ca sciusciva forte
senza sapè
‘e vole d’’e gabbiane,
‘e voce ‘e mare
ca passeno vicine
o luntane
quanna ‘a rezza
va piscanno a ‘o largo
speranno qualcosa
‘e purtà ‘nterra
pe fà felice chi te guarde e penza
all’anema ca sente
ma nun trova
‘a quanno ‘o munno nato.
Gioacchino Ruocco
Nessun commento:
Posta un commento