Che ne faccio d’’o tiempo ca me resta

 

Che ne faccio d’’o tiempo ca me resta

si feste dint’’a casa

nun se ne fanno cchiù,

si nun so capace

‘e sta n’ora ‘n pace

cu me stesso ?

 

Na vota se diceva ch’ire fesso

pe nu fatto comme a chisto.

Mò comme a tanta criste,

cu ‘e facce stralunate.

passammo a nu guaie a n’ato

senza ce rassignà

a chistu maletiempo

ca c’è arrevato ‘ncuollo

senza nu muorzo  doce

pe ce cunzulà.

 

Te guarde,

ma ‘a faccia toia è

peggio d’’a mia

ca staie ancora a dì:- E’ cosi sia

c’’o pater nostro appriesso.

 

Certo! Ognuno tene

nu modo ‘e reaggì

ma ‘o modo mio,

ca pure va cercanno

nu modo ancora ‘e credere,

nun sape addò appennere

tutte l’avemmaria

ca ‘o core ancora dice

p’essere felice,

ca ogne ssera chiagne

ma benedice chille ca cchiù forte

 scanzanno ‘a morte,

vanno a  dà ‘a pace

a chi ‘un è capace d’’a truvà.

 

Gioacchino Ruocco

Ostia Lido 05.04.2021