‘Ncopp’’e Quartiere.....

‘Ncopp’’e Quartiere

Si rifacite ‘e vie scuncecanno

‘e cose comme stanno

arresecammo ca si se rompe

‘o tubbo ‘e ll’acque,

o chillo d’’o gas

saie che spasse po’ pe cucinà

e pe sciacquarce ‘a faccia

ca sempe una

ne tenimmo nuie

chella ca fa burdello

facennese cchiù brutte

‘e comme ‘a tengo.

Dint’a stu vico

addò ‘a gente

quanno fa sulo “azzo”

me pare ch’è azzeccato

tutto cu ‘a sputazza

e se mantena allerta

pecchè ‘o Pataterno

ce dà sempe na mano

ma quanno ‘n ‘o po’ fà

‘e guardia mette uno ca st’all’inferno,

ca se diverte ca ccà piglia ‘o terno

quase tutt’’e juorno

mmiez’a tutta chella gente

ca vota ‘o valanzone ‘o gruosso

te guarde dint’a ll’uocchie

e sputa ll’uosso

ca nun se tene ‘nganna

cu nisciuno,

a quanno ‘o miedeco l’è ditto

ca  na mez’ora ‘e suonno

s’addà fa nicessariamente

si no fa ‘a fine ‘e chesta gente

‘mbriacata ‘e chiacchiere

e ‘mputente..

‘O saie quant’anne so

ca chesti ccase ancora stanno all’erta ?

‘O tiempo pare ca nun passa maie

p’’e guaje appriesso appriesso

ma ‘o tiempo passa pure stanno ccà.

Visto c’’o munno è gruosso

pur’isso tene ‘a fa  all’ati parte.

Na mana s’a fa dà ‘a chi ‘a tene

ca le cunviene e nun sta dint’’e chiese

c’’o cannelotto e ‘a lampa.

‘A ggente mò vò campà cchiù a luongo

e vò campà comme camp’isso

pe chesto qualche sforzo l’adda fà.

Si ‘a ggente quanno more è cchiù cuntenta

‘o paraviso sarrà pur’isso eterno.

Cchiù facce allere e chiù me pare overo

ca ll’aldilà pur’essa sta cagnanno,

se modernizza senza cchiù tristizzia

se po’ parlà, ridere e pazzià.

Facimmo nu miraculo ogne ghiuorno

dint’a si ccase ca so’ na cosa a parte

addò chi ‘o tene sparte

cu chi nun tene niente.

Ccà simmo malamente o tutte buone.

D’‘e truone nisciune ave paura.

Chi ‘a tene cammina muro muro

o se mantena luntano d’’o quartiere

Meglio esse furastiere

ca ‘ntussecà ‘a jurnata

a chille ca ce stanno.

Giacchino Ruocco

Ostia Lido            20.12.017