(di Ferdinando Russo)
 |
| Pupo siciliano |
I
— Ecco Linardo in campo! Il palatino!
‘O palatino ‘e Francia cchiù putente!
Teneva nu cavallo, Vigliantino,
ca se magnava pe grammegna ‘a gente!
Comme veveva, neh! Na votta 'e vino,
na votta sana, ‘un le faceva niente!
Nu surzo sulo, nu varrillo chino!
e se magnava ‘e zeppole vullente!
Po’ teneva na spata, Durlindana!
Uh ffiglio ‘e Dio, e che poc’ ‘ammuina!
Se sape! ‘A maniava chella mana!
Na notte, pe passà d’ ‘a Francia a’ Spagna,
chisto Linardo, neh, che te cumbina?
Caccia sta spata e taglia na muntagna!
II
N’ata vota, passanno pe nu campo,
vede ‘a luntano na cosa lucente!.
«Neh, che sarrà, fa isso, chisto lampo?
Se trattasse ‘e quaccosa malamente? . . . »
Erano turche! E nun ce steva scampo!
Erano cchiù de mille e cincuciente!
«‘A bona ‘e Dio» fa isso. «O moro o campo!
Ccà sta Linardo! Il cavalier possente! »
Stévano ‘e turche tuttequante armate!
Curazze e scute d’acciaro strafino,
da ll’Amustante ‘e Perzia cumannate!
«Hann’ ‘a fa festa! » Linardo penzaie.
Dette na sperunata a Vigliantino,
cacciaie ‘a spata, e nnanze se menaie!
III
«Io ve saluto! Caragnune belle! »
lle dicette Linardo: «Comme state?
Ve voglio fa’ magnà vrenna e sciuscelle!
Venitevenne, va, gioie d’ ‘o frate!
M’avite fatte troppo 'e farenelle!
Pure sotto, me site capitate!
Nne voglio fa’ tammore ‘e chesti ppelle!
Salutammo, fratié! V’aggio ncucciate! . . . »
E rotiando il braccio con la spata,
se mena ‘e capa sotto, mmiezo a lloro,
e n’accedette mille una vutata!
Non v’eri alcuni alla corte di Frangi
ca di costui facesse cchiù remmore!
Terribil spati e più terribil langi!
Il resto dei sonetti verrà pubblicato quando mi arriverà una vostra richiesta o quando me ne ricorderò.
Nessun commento:
Posta un commento